ورد الجزء الاول

 

واقفة في البلكونة سرحانة في شكل النجوم في السما 

وصوت الدكتور بيرن في ودانها وهو بيقول : انتوا في كلية أغلبها معتمد ع self study وانت لازم تسيرش بنفسك ع المعلومات محدش هيساعدك في كل خطوة ساعد نفسك في الاول !

" ورد يا ورد انتى فين قاعدة كل ده في البلكونه بتعملى ايه امتحانك بعد بكرة ولسه مفتحتيش كتاب !! هتموتينى ناقصة عمر !!! "

اول ما سمعت كلمة امتحان من مامتها

افتكرت الامتحانات و ضغط التسليمات وانها مش فاهمه اى حاجه ف المنهج وأن خلاص باقى ع امتحانها يومين

ف بدأت تعيط و ازاى هتقدر تنجح و تستوعب كل ده في يومين بس 

في نفس اللحظه 

 لقت نوتفكيشن رسالة ع موبايلها من رقم غريب و محتوى الرسالة أغرب 

 ‏" بطلى تعيطى يا ست ورد وامسحى دموعك فداكى ألف امتحان ايه يعنى Algorithm design انتى قدها ♥️ ، و ع فكرة انا مش معاكى في الكلية بس خدت بنصيحة الدكتور و عملت سيرش In Google وفهمت عادى ، أستنى ساعة وهبعتلك تانى يا ست ورد ♥️ ✨"

 ‏فضلت تبص للرسالة بصدمة 

 ‏ازاى عرف رقمها و ازاى عرف الى بتفكر فيه وازاى عرف اللقب بتاعها ، وقالت في نفسها اكيد هو حد من الجيران او حد من الشارع ، بس ازاى عرف وقدر يعمل كل ده 

 ‏دخلت جوا ل اوضتها تانى علشان تبدأ تذاكر

" بعد ساعة " 

كانت حاطه الهاند فري في ودانها بتسمع ام كلثوم و بتقرأ روايتها المفضلة " إيماجو "

و بدون تفكير لقت نفسها بتمسك موبايلها بفضول تشوفه بعت ولا لا ،

 برغم غرابة الموقف والرسالة و الرقم إلا أن كل ده معرفش يمنع فضولها من أنها تشوف هيبعت ولا لا

قالت في نفسها : أكيد مقلب من واحده من صحباتها ولازم تذاكر للامتحان

لسه هتقفل الموبايل لقت نوتفكيشن رسالة تانية منه 

" مستعجلة ع رزقك و هتقفلى ب يأس ليه ده انتى عليكى دقة في المواعيد يا ساتر ايه ده 

بس مفرقتش لان انا كمان كنت حاسبها بالدقيقة ..

هبعتلك تلخيصات انا عاملها بنفسي بعد ما بحثت كتير وسمعت لحد ما ودنى اتاكلت يكش تذاكرى بعد كل ده وتبطلى تسمعى ام كلثوم و قراية روايات في عز الامتحانات .. خدى بالك من نفسك يا وردتى 🌻♥️"

فضلت متنحة قدام الموبايل و ازاى بيعمل كده و مين ده و ليه الرقم مش بيظهرلها ف اى مكان ولا حتى الترو كولر ؟.. ياترى ده مقلب من واحدة صاحبتها ؟..

نقذها من تفكيرها برسالة تانية اقصد برسايل تانية 

عبارة عن تلخيصات ب خط ايده .. قالت في نفسها " خط راجل ده ازاى .. ده خطه احلى من وشي "

وبعتلها ف الاخر رسالة زودت حيرتها اكتر و اكتر :

" ع فكرة انا مش واحدة من صحابك انا كائن عادى من فصيلة الرجالة ، ياريت متفكريش كتير علشان مش هتعرفينى . و اه ده خطي عارف أنه حلو ، صحيح انا بحب كمان رواية " إيماجو " ، و ع عكس الناس ف انا مقتنع انها حقيقية برضو زيك . سلام يا وردتى "

رسالة زى دى فرحتها بس خوفتها ،، ازاى يحصل كده .. ازاى يعرف تفاصيلها .. ازاى يعرف انها مقتنعة بالرواية دى او بتقرأها !!

حيرتها و فضولها زادو .. بس ده ميمنعش الابتسامة الى اترسمت ع شفايفها وهى بتحس ب اهتمامه بيها وطريقة كلامه و كمان غموضه ..

رسالة تانى اتبعتت ليها : 

" بيقولو : إضحاك الجميلة ، تجارة رابحة .. ما بالك لو خليت ست ورد تضحك ! ده انا كده هبقى أغنى واحد في العالم كله " 

بعد ما شافت رسالته فضلت تدور حوالين نفسها ولأول مرة تفرح من كلمة حلوة اتقالت ليها ومن اهتمام حد بيها . لأول مرة تحس انها عايزت تطمن ، قفلت الفون و بدأت تذاكر بحماس بس عقلها بين لحظه والتانية بيخليها ترجع تفكر في المجهول الغريب 

 

ليلة الامتحان

صحيت من النوم بنشاط وبدأت يومها بالصلاة و هى بتصلى دعت كتير ان الامتحان يبقى سهل وتقدر تحله 

بعد ما خلصت صلاة تليفونها رن

_ الوو 

=الوو مين

_ انا ندى يا ورد فينك يبنتى 

= انا اهو موجوده بشوف مادة بكرة الى مش بتتلم دى 

_ طب بدأتى ولا لسه

= اه بدأت وخلصت اول شابتر 

_ طب بصي يا ستى الدكتور لغى اجزاء من الفصل التالت و الخامس و...

= بجد شكرا اوى يا ندى مش عارفه من غيرك كنت هعمل ايه منحرمش منك ابدا 

_ اصلا ده العادى بتاعى عدى الجمايل بقى يا ست ورد 

= هتعيشي الدور ولا ايه 😏 بطلناها الشغلانه دى .. يلا يا حجه ع المذاكرة نخلص إلى ورانا ده 

_ يا ساتر عليكى .. يلا يا ست ورد ، سلام 

= ماشي يست ،، سلام 

وبعد ما قفلت مع صاحبتها رجعت تانى للمذاكرة 

في الليل "

 

قاعدة ف اوضتها متوترة و خايفة ومش عايزة تكمل مذاكرة ولا تروح الامتحان و من غير أى مقدمات بدأت تعيط بصوت عالى شبه الأطفال و بتتمنى يحصل اى حاجه والامتحان ده يتأجل و متعرفش ليه بدأت تفكر في المجهول صاحب الرسايل 

في الوقت ده جاتلها رسالة منها

" بس بس كفاية عياط يا شيخه ايه ده سارينة !! بتعيطى كده اومال ليه ع السوشيال كل بوستاتك عبارة عن الى قادرة ع التحدى و ع المواجهة. معقولة الاسترونج اندبندت ومان بنفسها بتعيط .. الدكتور لغى ليكى اجزاء وعملتلك تلخيص للمادة و هبعتلك دلوقتى فيديوهين كل واحد ربع ساعه يعنى لو مقفلتيش المادة دى بكرة هتشوفي انا هعمل ايه . متعيطيش تانى و ركزى . انتى قدها يا وردتى "

من بين عياطها ضحكت و مسحت ب ايديها دموعها زى الاطفال و رجعت تذاكر تانى 

و قلبها بدأ يتعلق بيه من غير حتى ما تعرف هو مين .

جه يوم الامتحان الموعود و ورد راحت الامتحان كانت خايفه بس افتكرت رسايله ف اتطمنت .. اول مرة تطمن كده .. واول مرة تتحمس للمذاكرة كده بقالها سنتين فقدت شغفها تجاه الدراسة ..

الامتحان اتوزع و ورد اخدت ورقتها و سمت الله قبل ما تبدأ .. و اتفاجأت ب الاسئلة انها سهلة و مباشرة من غير أى surprise وعارفه تحلها كمان .. حمدت ربنا وكانت الضحكه مرسومة على وشها و كملت حل الاسئلة وهى طايرة من الفرحة . و أخيراً امتحان من غير مفاجآت او تعقيدات .

وهى مروحة سألت نفسها .. هل الامتحانات كلها كانت سهله بس انا الى كنت مستتقلاها ومستصعباها .. ولا المجهول ده قدر يسهلها المذاكرة لدرجة انها عرفت تحل كل الاسئلة من غير اى صعوبة !!

 

_ اااه مش تحاسب قدامك وانت ماشي 

= انا برضو الى احاسب انتى الى ماشية سرحانة ومش منتبهة وانتى بتعدى 

_ يعنى غلطان وكمان بتقاوح انا مشوفتش حد بالذوق ده قبل كده والله

= وانا اول مرة اشوف واحده شبر ونص ، لسانها اطول منها بمترين

" ورد يا ورد انتى فين يا بنتى وبتتخانقى مع مين كده صوتك عالى مش كبرنا ع الخناقات ولا ايه ؟؟

_ والله يا ماما ما جيت جنبه هو الى طول لسانه وقل ادبه عليا 

هو اتصدم وقال بصوت واطى : ورد !!

_ اه ورد ماله الاسم غريب ولا اول مرة تسمعه ولا هتتريق عليه ولا ناوى تت...

= بس بس بس ايه ده حنفية وفتحت .. صدق الى كان مسميكى حنفي بصحيح 

 _ انت عرفت الاسم ده منين ؟؟

 ‏ضحك زين بهدوء وقال : حتى نظرك ضعف ومعرفتنيش !

 ‏_ معقول زيين !!!

 ‏= يا فرج الله اخيرا نظرك لسه بخير 

 ‏فرحت ورد اول ما شافت زين و افتكرت ذكرياتهم من وهما صغيرين مع بعض و ازاى كانوا قريبين وحياتها كلها كانت معاه 

 ‏- انت جيت امتى مصر و ازاى تنزل من غير ما تقولى

 ‏= حبيت اعملها مفاجأة ليكى

 ‏_ ع اساس انك فاكرنى اوى

* ‏بس بس يا ولاد تعالى يا زين يبنى معانا البيت بقالى كتير اوى مشفتكش من ساعت ما سافرت ده انا حسيت انك اتبخرت ومش هشوفك تانى

 ‏= لا يا زيزى متشوفينيش ازاى ده انا اموت لو مشوفتكيش هو ليا بركة غيرك

 ‏* لسه بكاش زى مانت يا واد يلا تعالى باينك ع لحم بطنك من الصبح 

 ‏= ماشي يا حببتى جاى اهو وراكوا

طلع زين و ورد و مامتها البيت و قعدوا يتكلمو و ياكلوا مع بعض وبعد ما خلصوا 

* زين يا حبيبي اكيد وحشتك البلكونه بتاعتنا كنت بتلعب فيها دايما انت و ورد من وانتو صغيرين 

= اه والله يا زيزي وحشتنى فعلا 

* دى ورد كمان غيرت فيها و حطت حوض للسمك و زرعت ورد مبقتش بتقعد معانا دايما بلاقيها هناك 

_ ايه يا زيزي انتى بتسيحيلى قدام زين ولا ايه 

* هو انا لسه قولت حاجه يا ورد 

_ لا يا زيزي طبعا مقولتيش حاجه ولا اتكلمتى حتى  

• دايما ظالمانى كده 

= لا بصوا كملوا خناق انتو ، وانا هروح اشوف البلكونة واقعد فيها شوية 

راح زين للبلكونة و قعدت ورد مع مامتها بيتكلمو ، وفي الوقت ده رن موبايلها برسالة

فتحت الرسالة ولقت فيها : 

( " ‏تباهت بكِ الأزهار يا سيّدة الورد

وما أنتِ إلا وردٌ على ورد " شوفتى بقى لما ذاكرتى الى بعته ليكى هيخليكى تقفلى ازاى ؟ ،، باقى اخر مادة متكسليش و أبدأى استعدى ليها يا ست ورد )

بعد ما قريتها سألت نفسها هو ازاى بيعرفها كده .. هو مين ده و فين معقول قريب منها بالشكل ده ؟؟

جاتلها رسالة تانى منه ولقيته بيرد عليها ب :

( " أقرب من بسمتي لشفايفي

أقرب من إحساسي لقلبي " متفكريش كتير يا ست ورد قريب هتعرفى انا مين يا وردتى )

= انتى يابت مالك مسهمه كده ليه بقالى ساعه عمال انادى عليكى 

_ هاا بتقول ايه

= لا ده انتى مش معايا خالص في ايه يا ورد 

_ لا ابدا انا بس الامتحان مأثر شوية 

= طب فضيلى نفسك بقى علشان نخرج انهاردة يا وردتى 

_ انا برضو بقول كده يلا

بعدها دخلت اوضتها و بدأت تفكر تانى ف الى بيبعتلها و بعد تفكير فتحت عينيها بصدمة وقالت ف نفسها : ياترى زين هو الى كان بيبعت !! بس ليه مقاليش .. بس هو قالى يا وردتى !! يبقى اكيد هو 

لالا مبقتش فاهمه ولا عارفه حاجه بس انا هتأكد 

= ها خلصتى يا ورد ؟

_ لسه يا زين استنى 

= يا مسهل

كانت محتارة تخرج ب ايه انهاردة وفجأة لقت رسالة ع موبايلها كالعادة منه 

( تشبهين أميرات ديزنى يا ست ورد ف بدل الحيرة ألبسي الفستان اللبنى الى مسكاه في ايدك ده ومتنسيش تلبسي عليه الفيونكه اللبنى المنقطة في ابيض الى بتحبيها هتليق جدا مع الفستان يا سندريلا 💙)

استغرابها زاد اكتر وحاولت تكلم الرقم بس لقيته مغلق !! 

متعرفش ليه سمعت كلامه و لبست فعلا الفستان الى قالها عليه ونزلت مع زين الى حست انه هو الى بيبعتلها او هى بتحاول تسكت عقلها عن التفكير

= سرحانة في ايه يا ورد 

_ ولا حاجه في شكل البحر بس 

= الفستان لايق عليكى جدا و فيه شبه من الكارتون الى كنتى بتصدعينا بيه ده

وقفت ورد وبصتله بصدمة وقالتله : تقصد سندريلا ؟

= ايوة هى دى 

_ زين معلش ممكن تتصل بيا الفون بتاعى مش لقياه

= حاضر يا وردتى استنى هرن ع الموبايل دلوقتى

وهو بيرن . مسكت الفون من أيده وقالتله انت عرفت رقمى ازاى يا زين وانا مديتلكش رقمى و بقالى ٨ سنين مشوفتكش ف الرقم غيرته !! يعنى انت الى بتبعتلى ! 

= ببعتلك ايه يبنتى 

_ متغيرش الموضوع انت الى بتبعتلى بقالك يومين طب ليه مقولتليش 

= انا مبعتش حاجه ليكى 

_ متكذبش يا زين انت اكيد الى بتبعت !!

= بكذب؟ لا يا ورد انا اخدت رقمك من زيزي قبل ما ننزل ومبعتلكيش اى حاجه .. يلا نروح علشان أخرتى و لما نروح اتأكدى منها .. 

ندمت ورد ع طريقتها مع زين و تشكيكها فيه بس مقدرتش تمنع نفسها من شكوكها 

_ زين انا اسفه متزعلش علشان خاطرى ،، آآ انا بس ..

= متكمليش يا ورد خلاص يلا نروح علشان طنط متقلقش عليكى 

_ انت مدايق منى؟

= خلاص يا ورد مفيش حاجه .. يلا

مشت ورد جنب زين وهى ساكته وراسها في الارض و بدأ زين يقلب في موبايله وهو ماشي علشان يشغل تفكيره 

= ايه ده انت مبتشوفش وقعت الايس كريم ع القميص بتاعى 

• انا اسف حضرتك مخدتش بالى بس حضرتك الى كنت بتبص في الموبايل 

= ويعمل ايه أسفك همشي ازاى كده 

_ خلاص يا زين غلط كده ده صغير وكمان ده مش غلطه احنا الى غلطانين و اسفين ان الايس كريم بتاعك وقع 

= انتى بتغلطينى يا ورد !!

_ الغلط مننا احنا .. ثوانى هجيبلك واحد تانى غير الى وقع ده .. و دلق الايس كريم خير يا زين تعيش و تاخد غيرها بقى 😛

ورد مشت بسرعه وهى بتضحك وراحت اشترت ايس كريم للولد و طبطت ع شعره و رجعت تانى ل زين

_ ايه يا زين مالك

= مش عارفه مالى ، بتغلطينى قدام عيل صغير

_ الغلط كان منك .. يلا بقى علشان اخرنا

= ماشي يستى يلا كانت خروجة منيلة 

ومشوا هما الاتنين لحد البيت 

_ زين انت لسه زعلان

= لا خلاص مفيش حاجه يا ورد بس استغربت رد فعلك 

_ انا اسفه والله بس في حد بيبعتلى رسايل بقاله فترة ومن طريقته وانه بيعرف عنى حاجات كتير حتى الى بعمله او بفكر فيه بيعرفه من غير ما اقوله .. ف افتكرته انت 

= طب وبيعرف الى بتفكري فيه ازاى ساحر ده ولا ايه

ورد بتفكير: مش عارفه يمكن واحده من صحابي وحبت تعمل فيا مقلب

= ممكن برضو يلا بقى علشان الوقت أتأخر .. سلام

_ ماشي ، سلام ،، 

دخلت ورد بيتها وبعد ما دخلت اوضتها وبدأت تذاكر لقت رسالة من نفس الرقم الغريب بيقول فيها :

( مـَــالـِي أرَاكِ حَـــزِيـــنـَـةً تــَتَـأفـــَفٍـــي؟

يَبــدُوا علَى خَــدَيكِ حُــــزنَاً واكتِــئـَـاب!

 

يــُمـْـنــَا ويُــســْرى تَنــظــُرِيـنَ وتَرجُفِـي

والطَقـسَ فِي عَينَيكٍ يَشهدُ إضـطِـــرَاب

 

مٍـــن زَهـْــر خـــَدُك حِــلوَتِي فَلتَقـطِـفـِي

بُـسْـتـانَ خَـــدُكِ حِــلوَتـِي بَلَـغَ النٍصَــاب

 

فَلأجــلــُكِ ..شـِعــرَا نـَـظـمــتُ بأحــرُفِي

وبــِوصـفـــُـكِ ألّفــتُ أكـثَــر مِــن كِـتـَاب)

بعد ما قرت الرسالة بدأت تخاف منه وكتبت وهى بترتجف : أنت عايز أيه ؟ 

ف رد عليها ب 

الرد هتلاقيه في القصيدة الى بتسمعيها ل عمرو حسن دلوقتى 

هى كانت بتسمع "قصيدة مكتبهاش نزار " ل عمرو حسن

و جه المقطع ده من القصيدة

( عايزك ومش عايز غير ضحكتين لله 

 جاى بقول يا حياة وبقول تكونى الجاى نظرة عينيكى نجاة و دليل ب أن انا حي 

والاعمى سر عماه إهمال وجود الضي 

ف ازاى عينيا تضل إذا حان وبان ضيك ؟! ) 

ورد بدأت تتعصب من رسايله المجهولة و قررت تقفل موبايلها خالص علشان ميوصلهاش اى رسالة منه

ولكن تُرى هل سَيَكُفُّ عن ملاحقتها ؟

#إسراء_إبراهيم

#الست_ورد

 ‏

هل استمتعت بهذه المقالة أنضم إلينا من خلال أخر الأخبار عبر البريد الالكتروني

تعليق

يجب تسجيل الدخول لأضافة تعليق

عن الكاتب